BIZCOCHU DE YOGUR

  Ingredientes:
- un yogur, sabor a escoyer (l'envase va usase como midida pa los otros ingredientes)
- güevos, 4 grandes
- 1 sobre de levadura
 -farina, 4 vasos de yogur
- aceite d'oliva, vasu y mediu de yogur
- azucre blanca, tres vasos y mediu de yogur

  Preparación:

  El bizcochu de yogur ye una de les recetes de bizcochos caseros más conocíes y emplegaes. Conozse con esi nome por dos motivos: primero porque s'emplega yogur pa facelu y segundo porque se prepara usando los ingredientes midíos col vasu d'esi yogur. El sabor del yogur pue ser el que se quiera, anque lo más habitual ye emplegar unu natural o de llimón, nós probamos inclusive con unos de frutes de la viesca, y quedó mui ricu. Vamos yá a detallavos cómo preparalu en casa, vais ver que cenciellu resulta.

  Ponemos el fornu a 180ºC con calor enriba y embaxo pa que vaya coyendo esa temperatura mientres preparamos la masa del bizcochu. Ye siempre interesante facer esto cuando vayas a enfornar un bizcochu. 

  Nel vasu de la batidora vamos dir echando los güevos, el yogur, l'azucre y l'aceite d'oliva, y batimos bien, cola batidora tradicional, con barilles o como queráis. Cuando tengáis esi amiestu bien fechu, vamos amestando la farina y la llevadura amestaes adulces y ensin dexar de batir. Nun dexéis grumos de farina, la masa tien que quedar fina. 

  De siguío vamos escoyer un molde afayadizu pal bizcochu. Si usáis ún de silicona, podéis verter yá la masa nel mesmu, pero si nun lo ye, debéis engrasar les sos parés y base con manteca y dempués espolvoriscar farina. Faemos esto pa que nun s'apegue'l bizcochu y se desmolde fácilmente. Metemos el molde escoyíu cola masa arramada nel mesmu y bien estendía y dexamos enfornar 40 minutos más o menos. 

  Enantes de sacar el bizcochu del fornu hai que comprobar con un cuchiellu o pinchu que l'interior ta bien fechu. Si sal llimpiu ye porque yá ta llistu, y si sal con restos, hai que dexalu enfornar un poco más. Tenéi cuidáu de que nun queme per fuera, si veis que ta bien escuru, dexái'l fornu col calor namás perbaxo. 

  Cuando lu saquéis del fornu, dexalu que temple a temperatura ambiente y dempués desmoldalu y dexalu enfriar del too enantes de servilu. Pue comese asina o bien amestar dalgún otru complementu como pue ser mermelada, chocolate o miel.