¿QUÉ YE'L TIEMPU?

  Ye quien nos entrega too polo que lluchamos o quítanos aquello que descuidamos, quien ayuda a decidinos o quien fai que nos afoguemos nun mar de duldes.La nuesa vida compónse namás que de tiempu.

  Fai tiempu qu'entamé a construyir la mio vida y decidí  que cada lladrillu que punxera diba ser pa la mio propia "casa", non pal edificiu d'otros. El problema ye que fui poniendo tantos lladrillos durante los últimos años que nun me paré a pensar nin un segundu  como quería que fuese realmente, y agora que la tengo a medio facer doime cuenta de qu'hai coses que quiero cambiar, pero nun pasa nada, tengo tiempu, agora simplemente tócame desfacer parte de lo que tanto me costó construyir, pero nun voi a cometer el mesmu fallu, o quiciabes sí, nun sé, eses coses nun se saben, lo que sí sé ye que voi tomame'l mio tiempu pa diseñar un planu perfectu dafechu y asina anque tarde más cada lladrillu va ser el definitivu, o al menos eso espero, pero bueno, tengo tiempu pa correxir los errores depués de tol tiempu vivíu, deprendí que naide, absolutamente naide va regalate'l so "cementu" pa que tu construyas, siempre va pidir el so "cementu" de vuelta. Too tien un preciu nesta vida, hasta l'amor, porque l'amor necesita tiempu abondo, pa que l'amor consiga sobrevivir toa una vida necesita tol tiempu d'esta mesma,pero ye xenial, porque l'amor ye una de les poques coses nesta vida que te devuelve, con creces, tol tiempu qu'invertisti nél.